სოციალური უნარების პროგრამა

როგორ იწყება და ნარჩუნდება სანდო მეგობრობა?

ბავშვები დაფიქრდებიან, რას ნიშნავს მათთვის მეგობრობა და რა ეხმარება ადამიანებს ერთმანეთთან დაახლოებასა და ურთიერთობის შენარჩუნებაში.

თამაშების, ისტორიებისა და პრაქტიკული დავალებების საშუალებით ისინი ივარჯიშებენ ახალი მეგობრების გაცნობაში, სხვების თამაშში ჩართვაში, იმედგაცრუებასთან გამკლავებასა და ემპათიისა და კეთილგანწყობის გამოხატვაში.

როგორ მივაღწიოთ საერთო მიზანს, როცა ყველანი განსხვავებულები ვართ?

ბავშვის ცხოვრებაში ხშირად არის სიტუაციები, როდესაც საჭიროა სხვებთან თანამშრომლობა, დავალების შესრულება, იდეების გაზიარება და საერთო გადაწყვეტილების მიღება.

პრაქტიკული სავარჯიშოებით ბავშვები ისწავლიან ერთმანეთის მოსმენას, საკუთარი იდეის შეთავაზებას, სხვისი აზრის გათვალისწინებას, პასუხისმგებლობის განაწილებას, რიგის დაცვასა და შეთანხმებას.

როგორ მოვიქცეთ უთანხმოების დროს?

კამათი და უთანხმოება ურთიერთობის ბუნებრივი ნაწილია. მიზანი ყველა კონფლიქტის თავიდან აცილება კი არა, მისი მართვის სწავლაა.

რეალურ ცხოვრებასთან მიახლოებულ სიტუაციებზე მუშაობით ბავშვები ისწავლიან შეჩერებასა და მოსმენას, საკუთარი პოზიციის ახსნას, ინტერესების ეთიკურად დაცვას და ორივე მხარისთვის მისაღები გამოსავლის მოძებნას.

როგორ დავიცვათ საკუთარი თავი და დავეხმაროთ სხვას?

ყველა უსიამოვნო შემთხვევა ან კამათი ბულინგი არ არის. ბავშვი ისწავლის ჩვეულებრივი უთანხმოებისა და განმეორებითი საზიანო ქცევის ერთმანეთისგან გარჩევას.

ბავშვები ივარჯიშებენ, როგორ თქვან, რომ კონკრეტული ქცევა მიუღებელია, როდის გაერიდონ სიტუაციას და როდის და როგორ ითხოვონ დახმარება.